為人上司

為人老豆，我其實冇咩 surprise 。不過為人上司幾個月，發覺每每令我最慶既係，我條o靚會成日做埋啲有損佢自已利益既野。我地出黎搵錢喎，唔係做義工。我買俾佢部電腦係靚野，條友會當住晒啲同事面前話，「我唔駛買咁貴喎」。。咁點呢？唔買都買咗，我好浪費公司啲錢應該買部又慢又重既錢俾你囉好冇？跟住佢訂水，佢會訂多支，跟住自已 um $50 蚊出黎做按金（佢唔諗住會攞返架喎）。仆街，你係咪諗住第時出差都自已出錢？十年唔加人工都冇問題呀？條友又醒目，做野又快，又成日自已 OT 增值。啲冇經濟壓力既 80 後，又有時間，你玩晒啦，我又攰到乜都唔記得，遲到早走，又唔肯出差，仲日日嘈我老細要加人工。你咁搞法，我炒得啦係咪呀？？？

各位老豆

各位老豆：生咗個 B，每兩三個鐘餵一次奶，跟住掃風，換片，氹佢瞓，平時仲要返工喎。你地點會仲有時間寫扑架？？？

自我價值

一個人既自我價值應該用咩去衡量？做咗咁多年人，我都只係用男性既角度去諗。男人既自我價值，大都黎自於金錢同權力。所以男人後生時，通常都冇錢冇地位，亦冇乜自信。但若經年月，正常黎講，都會好啲。

但女人呢？我比較相信女人既青春就係自我價值既最大來源。但我唔明既係，女人十八廿二之後，自我價值係咪就只可以一直走下坡？十八歲雖然青春無敵，但唔識品味同打扮，好多女人其實廿幾三十幾後反而仲靚過當年十八歲既年華。

男人到中年，唔好咁快就話自已「人又老錢又無」。女人到中年，亦唔一定人老珠黃打扮黎都晒氣。只要努力，任何時候都可以有機會。女人年過四十，仲可以打扮得好靚。男人唔賺錢嫌自已窮，同女人唔扮但又嫌自已唔靚一樣，好唔爭氣。

多一個 B ，多一樣野俾人鬧

唔識做人老豆。

仲係俾啲拖都未拍既人鬧。

B

個 B 出世，最震驚除左啲血用無葫既影象外，護士幾次整痛老婆既叫聲，諗返起都想喊，同埋想返去打 7 個護士。

除此之外，朋友講，我生仔既原因，係愛。阿仔係一個我會全心全意去愛既人。

而返屋企既的士途中，我癮若覺得，對生命好似有另一種領會。

「相信」和「理據」

「相信」和「理據」本身是有衝突的。問題是，「相信」包含「沒有理據」的意思在裏面。
所以要用「理據」去令人「相信」，這句句子邏輯上是不能成立的。

例子：
一對男女。女說，我不相信你，除非你能證明你沒有偷食。
如果，男人有証據證明了沒有去偷食，哪麼女人就等如「相信」男人沒有去偷食嗎？

不。
因為理據當前，女人已經沒有不相信的機會。
拿出證明的一刻，只能證明，女人不相信男人。就只是這樣。

梁芷珊 - 最大面試貼士

梁芷珊，都算係一個傳奇人物。其中一篇講及公司與員工的關係。

http://hk.myblog.yahoo.com/cannycannyleung/article?mid=22995&prev=23218&next=22810

如果一支竹打晒一船人，淨係你請唔倒好既下屬，話知你啲下屬係 80/90/00/10 後，問題一定喺你度。

唯一唔太同意既係，要爬你上司頭。呢樣有違「自己人」既組織關係，現實社會裏機乎唔會出現。

變成地產商？

http://moneycafe-icable.blogspot.com/2011/05/blog-post_11.html

我有個諗頭。

基於聯匯同經濟問題，香港租金波幅好大。波幅大既問題係，所有就算好既既生意都因無法適應大起大落既租金下被迫結業。

可唔可以利用個基金，响適當時候，將鋪位或辦公室買入，然後租返出去。租金既上落就依利率，租客承擔....實質操作未諗通。但想 take 波幅上既風險，去換取比較穩定既回報，可行不可行？

廢人

原本都好少睇其他 blogger 啲 blog ，點知經 CK 介紹，唔睇由自可，一睇把幾火。

所以，都係俾心機炒股好過。錢是萬能的，自會教訓那些執迷不悔的人。

講返為人上司，有人以為，幫公司做事／賺錢最重要。結果對下屬多多要求，做死佢地。以為做得多就係生產力多，就係為公司賺錢。結果佢淨係識得鬧咩 80 後 90 後不濟，所有下屬都俾佢迫走晒。多年後仍是管理小貓兩三隻的上司。

可惜世事往往如奇。隔離 team 亦有另一上司，所謂 hea 住做。但因為識得留人，多年後已成為公司最大掌管，其 team 人數遠拋離其他 team ，其生產力同政治權力亦非其他小 team 能比。

回望多年來，邊位上司幫公司賺得多錢？你培養唔倒人才，keep 唔倒人，請完又走請完又走，一個人兩隻手，生產力就是你兩隻手既上限。咁究竟係你廢定下屬廢？

出路

唔知係咪抄開股票，慢慢開始所有野都用錢用資金流向去解釋，包括青少年問題。

若說 80 後無所事事，我會解釋為跟本就經濟唔好，個所謂既低失業率，呃人既。

我連埋我身邊既朋友，大部份都三十幾歲人，做咗十幾年野，職都算係有升過，成班人咩 title 都有。Manager, director, vice president, 但無論升到個 title 幾勁，始終都係一個下屬都無。唔都唔無既，總之唔喺香港囉，大陸有，印度有，菲律賓有。

咁我奇怪既係，我地班 70 後出黎做野之後就無再請過人喇，咁班 80 邊有野做呀？

好自然，無工做，仲有咩希望呀？

80 後無希望，就連帶讀緊書既 90 後都無希望架啦。90 後唔係白痴，佢地好清楚將來有咩工做，咩人工。既然無希望，咁不如搵其他野搞好過。將心比己，若我係呢個年紀既人，我都會係咁。唔怪得佢地。

而因為經濟唔好，就算 70／80 勉強能成家立室，但兩公婆都一定要出黎做野，個細路唯有工人湊，咁啲細路亦好聰明，明知嗰個係工人，做咩會聽個工人話？所以啲細路亦一定乖極有限。家長自已無時間教過啲細路，學校老師要見家長，咁一定係家長自已唔啱喇。人要面樹要皮，要認錯，好難。家長同教師自然難合作。況且，教師喎，佢地跟本上都未接觸過社會，對比我地呢啲社會上生存左咁耐既人，我地讀書又多過佢地，實在好難聽佢地講。

又，70／80 後因為無錢，生少咗，另學校開少咗班，政府撥錢俾佢地自然少咗。政府於是就唔知咩原因諗埋啲人口政策既屎穚，寧放寛內地人落黎生仔，都唔資助／幫助本地香港人生仔。結果可以預見倒將來會越黎越多大陸人向香港讀書。始終文化水平有出入，啲細路恐怕越黎越難教。

咁政府又可以做啲乜？無架，繼續高地價政策囉。靠賣地俾大地產商，收錢返黎補貼呢啲社會問題既受害人囉。受害人越黎越多，咪唯有再谷貴啲啲地價，可以賣地賣得貴啲，賣多啲錢咪可以補貼多啲窮人囉。所以窮人唔攞綜緩跟本就係同政府唔合作，做成社會問題。我是一啲都唔欣賞的。

關於生仔，我想說的是....

我從來做事，都好清楚其原因，係唯獨生仔，我真係唔知點解。我最怕既就係將來個仔出黎之後唔開心，個仔問我點解要生佢出黎受苦，我真係唔識答佢。呢樣野係 direct parallel to 神創造人，我都好唔明，神點解要創造人，佢係咪同我一樣唔知點解？曾經有神父答我，神創做人因為佢有能力。但若果我同我個仔講，我生佢因為我有性能力，我諗佢會想斬死我。

我現時反而覺得最合理既答案，就係我生佢出黎，等佢長大有一番作為後，話我知我點解要生佢。但係我，又答唔答倒神為乜要做我出黎？

認識

記得開始寫 blog 既時候，眾 blog 友久唔久都會討論某 blogger 既真實同虛疑身份。但其實，真實同虛疑差距係咪真係兩個唔同人呢？

噚晚發生咗一件幾有趣既事。大約十五六年前，我和一班網友，由一個網名「肥仔超人」既帶領下，共同建立咗一個叫「老友鬼鬼」既網站。網店收集各區中小學生既資料，目的係借助互聯網幫大家搵返以前失散咗既舊同學。

網站維持咗一段時間，仲發展得好快。但後來一啲原因，網頁歸一數據中心管理，而一眾幫手建立網站既朋友就被迫解散。

呢班網友，當時日日傾計，message board 傾完 ICQ 又傾，變得好熟絡。但網站解散後，大家就再無聯絡。就咁轉眼之間就十五六年。突然機緣巧合下，於幾個禮拜前，facebook 上竟然搵返當年一齊共事既網友，噚晚就係咁出咗黎食飯。對我黎講，「相識」一班人成十五六年，先第一次見面，都係第一次。

飯局中大家好似失憶咁，好多野都完全無晒記憶。但最神奇既係，當中有幾位我印象非常之深，完全唔能夠相信我係從來未見過佢地。初時我仲以為係我先係咁，但後來講返大家以前見過幾多次，竟然當中有人肯定見過我真人﹗但佢地其實係咁多年來都唔識讀我個名（我以前都一直用真名。。），又講唔出我地以前有咩 event 又無我地既合照。我能夠得倒既結論，就係認識一個人就係認識一個人，基本上就無虛疑同真實之分，所以才會混淆。

係咪好有趣先？

殊途同歸

我與一位相識十多年的老死，有著很不一樣的理財和花費行為。例如我賺得十元，只會花五元。他有十元，會花十二元。他從不投資，我郤將儲起來的錢都去買了股票。

其實大家都看不過眼大家的行為，大家都有不同的理念。我以為，放長雙眼，應可見其後果。十多年來，我卻發現，大家理念雖南轅北轍，結果卻竟然殊途同歸，大家仍然是死窮鬼。