出路

唔知係咪抄開股票，慢慢開始所有野都用錢用資金流向去解釋，包括青少年問題。

若說 80 後無所事事，我會解釋為跟本就經濟唔好，個所謂既低失業率，呃人既。

我連埋我身邊既朋友，大部份都三十幾歲人，做咗十幾年野，職都算係有升過，成班人咩 title 都有。Manager, director, vice president, 但無論升到個 title 幾勁，始終都係一個下屬都無。唔都唔無既，總之唔喺香港囉，大陸有，印度有，菲律賓有。

咁我奇怪既係，我地班 70 後出黎做野之後就無再請過人喇，咁班 80 邊有野做呀？

好自然，無工做，仲有咩希望呀？

80 後無希望，就連帶讀緊書既 90 後都無希望架啦。90 後唔係白痴，佢地好清楚將來有咩工做，咩人工。既然無希望，咁不如搵其他野搞好過。將心比己，若我係呢個年紀既人，我都會係咁。唔怪得佢地。

而因為經濟唔好，就算 70／80 勉強能成家立室，但兩公婆都一定要出黎做野，個細路唯有工人湊，咁啲細路亦好聰明，明知嗰個係工人，做咩會聽個工人話？所以啲細路亦一定乖極有限。家長自已無時間教過啲細路，學校老師要見家長，咁一定係家長自已唔啱喇。人要面樹要皮，要認錯，好難。家長同教師自然難合作。況且，教師喎，佢地跟本上都未接觸過社會，對比我地呢啲社會上生存左咁耐既人，我地讀書又多過佢地，實在好難聽佢地講。

又，70／80 後因為無錢，生少咗，另學校開少咗班，政府撥錢俾佢地自然少咗。政府於是就唔知咩原因諗埋啲人口政策既屎穚，寧放寛內地人落黎生仔，都唔資助／幫助本地香港人生仔。結果可以預見倒將來會越黎越多大陸人向香港讀書。始終文化水平有出入，啲細路恐怕越黎越難教。

咁政府又可以做啲乜？無架，繼續高地價政策囉。靠賣地俾大地產商，收錢返黎補貼呢啲社會問題既受害人囉。受害人越黎越多，咪唯有再谷貴啲啲地價，可以賣地賣得貴啲，賣多啲錢咪可以補貼多啲窮人囉。所以窮人唔攞綜緩跟本就係同政府唔合作，做成社會問題。我是一啲都唔欣賞的。

關於生仔，我想說的是....

我從來做事，都好清楚其原因，係唯獨生仔，我真係唔知點解。我最怕既就係將來個仔出黎之後唔開心，個仔問我點解要生佢出黎受苦，我真係唔識答佢。呢樣野係 direct parallel to 神創造人，我都好唔明，神點解要創造人，佢係咪同我一樣唔知點解？曾經有神父答我，神創做人因為佢有能力。但若果我同我個仔講，我生佢因為我有性能力，我諗佢會想斬死我。

我現時反而覺得最合理既答案，就係我生佢出黎，等佢長大有一番作為後，話我知我點解要生佢。但係我，又答唔答倒神為乜要做我出黎？

Hello Day

其實呢度仲有冇人睇架？
奇怪係唔知幾時開始，己經無再諗摺唔摺扑既問題。
原來會諗摺扑，都只因有壓力。

無視私隱

其實香港法律同制度上都好容易察覺到非常之唔重視個人私隱。我個手提電話每個星期甚至响外地 roaming 都唔知收到十個以上既 spam 電話，浪費咗幾多錢同時間？如果法律唔許可，我大可以追溯返佢地邊度得倒我個電話，然之後告到佢地甩褲。但而家，除咗收線係乜都做唔倒，直頭係吹佢地唔脹。電話公司係咁，銀行係咁，信用卡公司係咁。由此可見，香港係絕對唔容許高科技高資訊既科技出現。你話若果 google 係香港公司，google calender 可以賣你啲資料俾任何人，咁你幾時响邊度約咗邊個呢啲資料都可以俾人買得到，咁仲有冇人會用你個 service?